Mbrëmjen e të mërkurës në ‘Opinion’ janë publikuar disa të dhëna interesante të INSTAT, përpunuar nga revista ekonomike Monitor, sa i përket importeve Kolumbiane drejt Shqipërisë.
Sipas të dhënave zyrtare të INSTAT, në vitin 2015, importet totale nga ky shtet ishin 64.5 milionë lekë, ose rreth 480 mijë euro. Produkti kryesor që importohej ishin “Kafe, çaj dhe erëza”, në sasi minimale prej 30 milionë lekësh dhe “frutat dhe arrat e ngrënshme” prej 12 milionë lekësh.
Në 2016-2017, importet nga ky shtet shënuan një rritje të shpejtë. Në 2016-n arritën në 609 milionë lekë, ose 4.5 milionë euro, me dhjetëfishim. Tendenca rritëse vazhdoi edhe në 2017-n, teksa importet në total arritën në 6 milionë euro, me një rritje prej 36%.
Dy janë grupet që kanë ndikuar në këtë rritje. Së pari, importi i “Frutave dhe arrat e ngrënshme” kërceu nga 90 mijë euro në vitin 2015 në 2 milionë euro në 2016-n dhe 2.2 milionë euro në 2017-n, 99% të të cilave e përbëjnë bananet, sipas të dhënave të detajuara nga doganat.
Së dyti, në 2016-n, një produkt i ri filloi të tregtohej nga Kolumbia, ai i “Lëkurëve të papërpunuara dhe të përpunuara”, që arriti në 2.2 milionë euro në 2016-n dhe 2 milionë euro në vitin 2017. Kolumbia kaloi direkt në importuesin e katërt më të madh të këtij produkti, pas Italisë. Nga Kolumbia u importuan 175 mijë kg lëkurë, me një çmim mesatar për kg prej 1577 lekë.
Kujtojmë që vetëm dy muaj më parë (në 28 shkurt) shteti i Kolumbisë u kthye në kryefjalën e ditës në Shqipëri, pasi Policia kapi në Durrës ngarkesën më të madhe të kokainës në historinë shqiptare prej 613 kg, në një kamion me banane që ishte nisur nga Kolumbia.
/opinion.al
