Saimir Tahiri është përgjigjur ëpr Arben Frrokut me insistimin e gazetarëve. Sapo ka vendosur kurorat me lule në varrezat e Dëshmorëve ai u pyet për mos veprimet e policisë në lidhje me Frrokun. Ministri theksoi se ka përpiluar një raport që ia ka dërguar ndërkombëtarëve dhe ku rezulton se policia ka vepruar komform ligjit.
Pyetje: A ka nisur ndonjë hetim për vonesën e procedurave, pasi siç kemi mësuar problem kanë qenë shenjat e gishtave të zotit Frroku, të cilat nuk ishin në sistem?
Ministri Tahiri: Unë kam kërkuar personalisht një vlerësim të të gjitha veprimeve të Policisë nga partnerët ndërkombëtarë që ditën që është marrë vesh lajmi. Partnerët ndërkombëtarë dhe misionet e ekspertizës në Shqipëri kanë hetuar në mënyrë të pavarur mënyrën si ka vepruar Policia e Shtetit. Dje është bërë raporti. I është dorëzuar të gjithë partnerëve. Dhe Policia e Shtetit ka bërë gjithçka konform ligjit. Kështu që…
Pyetje: Përse nuk ishte shpallur në kërkim në faqen e Interpol-it?
Ministri Tahiri: Ju lutem më lini të mbaroj. Kaq mund të mjaftojë për këdo që ka ende kuriozitetin nëse Policia e Shtetit vepron sipas ligjit apo jo.
Sakaq Tahiri e ndërpret komunikimin për Frrokun dhe flet për reformën në Drejtësi.
Ministri Tahiri: Përtej kësaj, vijoj ta theksoj, më e rëndësishme se gjithçka tjetër është Reforma në Drejtësi. Ka shqiptarë që kanë dhënë jetën për ta bërë këtë vend më të drejtë. Nga ne sot kërkohet që të japim votën, ndaj është themelore që në kujtim të atyre që sakrifikuan jetën dhe mbi të gjitha në respekt të familjeve të dëshmorëve e të gjithë shqiptarëve që sot me të drejtë presin një Shqipëri më të drejtë, ne të mos vonohemi asnjë orë më shumë dhe të votojmë Reformën në Drejtësi.
