Mentor Kikia-Padyshim që me çështjen e negociatave tani do të bëhet politikë. Loja “e ka, kush e ka”, do të vazhdojë. Ne nuk do të bëhemi “europianë” dhe as një shtet modern nëse na hapin negociatat, por ajo që do të përfitonim do të ishte një presion më i madh i institucioneve të BE-së ndaj qeverisë dhe institucioneve tona, për të bërë ca reforma e për të vënë në punë drejtësinë.
Padyshim që dielli do të lindë edhe të hënën, siç tha kryeministri ynë, për të treguar se jeta jonë do të vazhdojë. Ne nuk do të mbajmë zi dhe ne shesh do të ketë sërish koncerte. Por duhet të kuptojmë se ky është një moment i rëndësishëm historik, që ne e humbëm.
Për këtë arsye, pas kësaj, ne kemi nevojë për një shkundje, më të fortë se ajo e tërmetit të 21 Shtatorit.
Kemi nevojë të marrim ca vendime brenda vetes, për çfarë do të bëjmë dhe duhet të bëjmë për të ardhmen e këtij vendi. Ne te kundert do te marrim ndeshkime me permasa historike.
Negociatat duhet të na i hapnin. Por fajin, gjithësesi, nuk na e kanë as francezët e as holandezët.
Po flasim për vende ku ministrat dhe deputetët shkojnë në punë me autobuz e biçikletë, kurse në vendin më të varfër të Europës ministrat blejnë, me paratë e taksave tona, makina 100 mijë Euro.
