Informatori, ankesa e të cilit ka çuar në ndërmarrjen e një procedure shkarkimi ndaj Presidentit Donald Trump është një oficer i CIA-s, raportojnë mediat amerikane.
Oficeri pa emër dikur punonte në Shtëpinë e Bardhë, thotë BBC duke cituar burime amerikane.
Informatori thotë që zyrtarë të lartë të Shtëpisë së Bardhë u përpoqën të “bllokonin” të gjitha detajet e një telefonate midis Trump dhe presidentit të Ukrainës. Trump kërkoi të dijë se kush i dha këtij personi informacionin , duke thënë se burimi ishte “një spiun”.
Në telefonatën në 25 korrikut, Trump e shtyu Volodymyr Zelenskyn të hetojë rivalin e tij kryesor politik demokrat, Joe Biden.
Ankesa, e lëshuar të enjten, thotë se transkripti i thirrjes nuk ishte ruajtur në sistemin e zakonshëm kompjuterik. Ajo ishte ruajtur në një sistem të veçantë të përdorur për informacion të klasifikuar.
Demokratët akuzojnë presidentin Trump se po kërkonte ndihmë të huaj me shpresën e njollosjes së Joe Biden – i cili po kërkon emërimin e Demokratëve për zgjedhjet presidenciale të vitit 2020 – dhe se ka përdorur ndihmën ushtarake për Ukrainën si një mjet bisedimesh.
Trump mohon çdo keqbërje dhe ka cilësuar procedurën e shkarkimit si një “mashtrim” dhe “një tjetër gjueti shtrigash”.
Ai pranoi se personalisht bllokoi rreth 400 milion dollarë në ndihmë ushtarake për Ukrainën ditë para se të fliste me Zelenskyn, por mohoi se ishte për të bërë presion ndaj liderit ukrainas për të hetuar Biden. /Opinion.al
