Një shitës ambulant në kryeqytet, ditën e sotme, ka zgjedhur një mënyrë krejt të veçantë të protestës qytetare.
Ai shet çdo ditë banane në një cep të Tiranës dhe siguron me vështirësi paratë e mbijetesës nga shitja e këtyre produkteve, nën frikën e aksioneve të vazhdueshme të policisë bashkiake.
Mirëpo, Rustemi, është gjobitur shtatë herë, ndërsa arka me banane i është sekuestruar tre herë të tjera.
Por në pikun e debatit për heqjen e imunitetit për ish-ministrin e Brendshëm, Saimir Tahiri dhe njëkohësisht deputet i PS, ai ka protestuar në një formë krejt origjinale.
Kur ligjin e shkelim ne, quhet Krim!
Kur e shkel qeveria, quhet Politikë!
Më 14 gusht 2015, Bashkia e drejtuar nga Erion Veliaj mori vendimin për lirimin e hapësirave publike të zaptuara në mënyrë të paligjshme, ndërsa policia bashkiake organizoi disa aksione radhazi kundër tregtarëve ambulantë.
Në pamundësi për të braktisur shitjen e produkteve bujqësore, “ambulantët” janë zhvendosur nga rrugët kryesore drejt hapësirave mes pallateve apo lagjeve të brendshme, ku është më e vështirë të diktohen nga policia.
Nga gushti i vitit 2015, policia bashkiake e Tiranës, ka vendosur mijëra gjoba mbi tregtarët ambulantë për zënie hapësirash publike, ndotjen e ambientit dhe ushtrim të aktivitetit pa leje.
