Ka më diçka më shumë se 5 orë që anëtarët e Komisionit të Mandateve dhe prokurorët e çështjes Saimirt Tahiri janë mbledhur në fshehtësi të plotë në një nga sallat e Kuvendit për të parë provat që Prokuroria ka në implikimin e Saimir Tahirit në akuzat për përkrahje të grupeve kriminale që merren me kultivimin dhe trafikimin e lëndëve narkotike. Edhe pse palët në komision qoftë të majtë dhe të djathtë nuk kanë bërë publike se çfarë po ndodh në brendësi të sallës, mësohet se mbledhja me dyer të mbyllura është mbërthyer nga një debat i fortë midis socialistëve dhe demokratëve ku të parët vazhdojnë të mos jenë të bindur në provat e sjella nga Prokuroria dhe të djathtët që ngulmojnë që provat janë të mjaftueshme. Në këto orë janë marrë në shqyrtim provat shtesë të përgjimeve që kanë mbërritur nga Italia, ku janë edhe 400 faqe fashikull, ndërsa nuk dihet nëse do të ketë një vendim sot.
