Kryetari i Partisë Demokratike Lulzim Basha ka përshëndetur deklaratën e zv/Ndihmës Sekretarit Amerikan të Shtetit Hoyt Brian Yee në lidhje me çështjen “Tahiri”, i cili deklaroi se askush nuk është mbi ligjin.
Në një postim në Facebook, Basha shpreh mbështetjen ndaj prokurorëve dhe gjyqtarëve për të mos u ndikuar nga presionet politike dhe të hetojnë deri në fund dosjen “Habilaj” dhe implikimin e dyshuar të ish-ministrit të Brendshëm Saimir Tahiri.
“Deklarata e qeverisë amerikane është e qartë: askush nuk është mbi ligjin, askush nuk duhet të gëzojë imunitet nga ligji, prokurorët dhe gjyqtarët duhet t’i shkojnë deri në fund çështjes, është përgjegjësi e qeverisë të tregojë me vepra se është kundër krimit dhe korrupsionit.
Duke përshëndetur deklaratën e Zëvendës Ndihmës Sekretarit Hoyt Brian Yee, i inkurajoj fuqimisht prokurorët, gjyqtarët dhe të gjithë punonjësit e drejtësisë që të mos ndikohen e mos tremben nga asnjë presion politik dhe të mos ndalen as të shkurajohen por të punojnë me kurajo profesionale dhe përkushtim atdhetar deri sa të nxjerrin të vërtetën dhe të bëjnë drejtësi në çështjen Tahiri.
Është momenti që Rama dhe shumica në pushtet të ndalin sulmet dhe kërcënimet ndaj prokurorëve, gjyqtarëve, dhe dëshmitarëve, të cilat kanë dëmtuar bërjen e drejtësisë në rastin Tahiri, dhe besueshmërinë e popullit se politikanët nuk janë mbi ligjin. Pandëshkueshmëria e politikanëve duhet të marrë fund.
Propagandën dhe llomotitjet në hava për drejtësinë nuk i beson më askush. Sot qytetarët presin të shohin me vepra se politikanët përgjigjen para ligjit dhe dënohen kur shkelin ligjin”, shkruan Basha
Kujtojmë që ditën e sotme në Kuvend u votua kundër heqjes së imunitetit për deputetin Saimir Tahiri. Prokuroria do të hetojë Tahirin edhe pse ai është deputete, për kontrollo personal dhe në banesë, e po ashtu Tahirit i është ndaluar largimi nga Shqipëria. Për këtë vendim të Parlamentit ka patur reagime të ashpra nga opozita.
Ndërsa zëvendës ndihmës sekretari amerikan i shtetit, Hoyt Brian Yee, tha sot në Prishtinë se Shtetet e Bashkuara janë të përfshira në procesin e bisedimeve ndërmjet Kosovës dhe Serbisë dhe do të vazhdojnë të kryejnë pjesën e tyre të punës në këtë proces. Në një intervistë me korrespondentin tonë në Prishtinë, Leonat Shehu, ai ritheksoi se Serbia nuk mund të qëndrojë e ulur në dy karrige por duhet të bëjë të qartë zgjedhjet strategjike të saj. Duke folur për zhvillimet në Shqipëri, ai tha se individët nuk duhet të shënjestërohen pse i takojnë një partie politike apo një tjetre, por parimi themelor është se askush nuk duhet të jetë mbi ligjin. /Opinion.al
