Konferenca e Kryetarëve pranoi kërkesën e grupit të Alibeaj për interpelancë urgjente me kryeministrin Edi Rama për çështjen McGonigal. Krahas kësaj, konferenca miratoi kalendarin dhe programin e punimeve të Kuvendit.
Ndërkohë, në mbledhjen e sotme, përfaqësuesja e PD në Konferencën e Kryetarëve, Flutura Açka ka ngritur shqetësimin për mënyrën se si u mbyll seanca e shkuar duke shmangur kështu debatin për skandalin McGonigal.
Açka e quajti fashizëm Parlamentar atë që ndodhi në Kuvend.
“Po ndodh fashistizimi i Parlamentit. Në nuk jemi as prokurorë dhe as inkuizitorë por jemi mandatuar të kërkojmë llogari dhe mbyllja e seancës është shkelje e Rregullores së Parlamentit dhe Kushtetutës së Republikës”, – mësohet të ketë thënë deputetja demokrate.
Të hënën e kaluar, kreu i PD, Sali Berisha dhe disa deputetë demokratë bllokuan foltoren e Parlamentit, duke akuzuar mazhorancën se po tenton t’u mohojë fjalën deputetëve të opozitës.
E gjithë situata ndodhi pasi deputetët e PS votuan kundër kërkesës së 16 deputetëve të PD , të cilët i kërkuan kryetares së Kuvendit, Lindita Nikolla që të ndryshohej rendi i ditës dhe të diskutohej mbi takimet e kryeministrit Edi Rama me ish-zyrtarin e FBI-së Charles McGonigal./Opinion.al
