Turqia është ende në pritje të një reagimi zyrtar nga Shtetet e Bashkuara, pas hetimeve për vrasjen e gazetarit saudit, Jamal Khashoggi.
Presidenti turk Tayip Erdogan theksoi sërish se Turqia është e vendosur t’i dërgojë hetimet në gjykatë ndërkombëtare, duke dërguar dhe informacione e dokumente. Ai kërkoi nga Cia dhe Trump të bëjnë më shumë për këtë çështje, si dhe të mos e lënë mënjanë këtë çështje për shkak të lidhjeve me Rijadin.
Ai shtoi se Khashoggi nuk duhet të “hidhet poshtë” për shkak të lidhjeve të ndërsjellta të Uashingtonit me mbretërinë.
Khashoggi, gazetar i Washington Post dhe kritik i princit të kurorës saudite, Mohammed bin Salman, u vra në konsullatën saudite në Stamboll më 2 tetor, duke provokuar revoltë ndërkombëtare. Sipas “Reuters” besohet se trupi i tij është shpërbërë, pasi nuk është gjetur ende.
Autoritetet arabe fillimisht kanë mohuar të kishin lidhje me vrasjen e tij, por pas disa hetimeve kryesisht nga inteligjenca turke, ata pranuan se ngjarja kishte ndodhur në konsullatë por mohuan përfshirjen e drejtuesve më të lartë të vendit në vrasjen dhe zhdukjen e gazetarit.
Teksa pritet përfundimi i hetimeve, Ergogan akuzon SHBA-në se reagimet nga ana e saj kanë qenë të vakta./E.M
