Koha e të paprekshmëve ka mbaruar! Ky është paralajmërimi i kryeministrit Edi Rama, i cili në një postim në Twitter përshëndet aksionin e policisë për të kontrolluar banesat e tre gjyqtarëve, që zbutën dënimin me burg të përjetshëm për Dritan Dajtin.
“Faleminderit me një përulje të thellë shërbëtorëve të shtetit që thyen mitin 30 vjeçar të paprekshmërisë absolute të kriminelëve me toga të zeza Duke u treguar vrasësve të drejtësisë për 4 policët e vrarë se koha e të paprekshmëve po mbaron, shteti sot ka hyrë në një fazë të re”, shkruan kryeministri Rama.
Në Tiranë, Vlorë, Lezhë dhe Sarandë, Policia e Shtetit që prej mëngjesit ka zhvilluar aksione në banesat e 3 gjyqtarëve. Këto kontrolle ushtrohen në vijim të hetimeve të nisura ndaj treshes së gjyqtarëve të dyshuar për korrupsion: Petrit Aliaj, Skënder Damini dhe Aleks Nikolli.
Janë kontrolluar banesa e Petrit Aliajt në Sarandë, dy banesat e gjyqtarit të Apelit Vlorë, Skënder Damini (një në Vlorë dhe një në Farkë) dhe banesa e Aleks Nikollit në Lezhë.
Nga kontrollet në banesat e Aliajt dhe Nikollës nuk ka konfirmim nëse janë gjetur sende të ndaluara apo shuma parash të pajustifikuara. Por, konfirmohet se në banesën e Daminit në Farkë janë gjetur 17 000 euro dhe municione. Për këtë arsye, Skënder Damini, i cili ishte në shtëpi gjatë kontrollit, u shoqërua në Policinë e Tiranës.
