Gjykata e Posaçme ka rrëzuar një vendim të SPAK, i cili vendosi që të pushonjë hetimet për 3 gjyqtarët që pranuan gjykimin e shkurtuar për Dritan Dajtin, duke e shpëtuar atë nga burgimi i përjetshëm.
Në shkurt të vitit të kaluar, Prokuroria e Krimeve të Rënda kishte nisur procedim penal për akuzat e korrupsionit dhe shpërdorimit të detyrës për 3 gjyqtarët e Apelit të Krimeve të Rënda, pas vendimit të tyre për ta dënuar me 25 vite burg Dajtin, të shpallur fajtor për vrasjen e katër efektivëve të policisë.
Pas nisjes së hetimeve, Policia ekzekutoi edhe një urdhër për kontroll të banesave të tre prej gjyqtarëve. Operacioni u zhvillua në 5 banesa të tre gjyqtarëve, në qytetet Tiranë, Vlorë dhe Lezhë dhe në atë kohë, në banesën e gjyqtarit Skënder Damini u gjet një shumë prej 20 000 eurosh.
Ky i fundit, bashkë me gjyqtarët Aleks Nikolli dhe Petrit Aliaj kishin vendosur pro zbatimit të gjykimit të shkurtuar, ndërsa gjyqtarët Fuat Vjerdha dhe Lindita Hoxha ishin shprehur pjesërisht kundër.
Por edhe pse gjyqtarët u akuzuan për korrupsion, sipas SPAK, pushimi i çështjes është bërë për shkak se nuk ka fakte për kryerjen e veprës penale.
Po vendimi përfundimtar erdhi nga gjyqtarja Liljana Muça, e Gjykatës së Posaçme që vendosi të kthejë çështjen nën hetim për një periudhë tre mujore./ Opinion.al
