Prokuroria e Tiranës mbylli hetimet dhe dërgoi në gjykatë nën akuzën e mashtrimit me pasoja të rënda të kryer në bashkëpunim ish-drejtorin e CEZ në Shqipëri Josef Hajcek dhe vartësin e tij, Jan Ivan.
Për të njëjtën histori është nën gjykim në një tjetër proces penal edhe ish-administratori i mbledhjes së borxheve të CEZ, Kastriot Ismailaj.
Prokuroria thotë se dy shtetasit çekë, të cilëve iu është njoftuar akuza përmes letër-porosisë kanë përdorur të dhëna fiktive dhe kanë vjedhur nga CEZ shumën prej 649 milionë lekësh. Kjo vlerë i është paguar shoqërisë DIA, dega Shqipëri, për shërbime që nuk janë kryer.
Me detyrën e kryetarit të bordit të drejtoreve Josef Hajcek dhe Jan Ivan si anëtar i këtij bordi, të dy ata kanë patur dijeni për falsifikimin e dokumentacionit të dorëzuar nga i pandehurit tjetër Kastriot Ismailaj, i cili mbahet në paraburgim prej dy vitesh. Duke bashkëpunuar me njëri-tjetrin të pandehurit kanë vjedhur Kompaninë CEZ, e për rrjedhojë edhe shtetin shqiptar, i cili në atë kohë zotëronte aksione të kësaj shoqërie.
Prokuroria e mbështet qëndrimin e saj mbi prova të tilla sikurse janë paraqitja e të dhënave të rreme gjatë nënshkrimit të kontratës, paraqitjen e një raporti fiktiv për identifikimin e debitorëve në një kohë që shoqëria DIA nuk kishte kryer asnjë proces të tillë.
Vetëm nga paraqitja e këtij raporti që në fakt ishte një produkt i thjesht elektronik mbi të dhënat ekzistuese janë përfituar 1,5 milionë euro thotë prokuroja e çështjes, Antoneta Sevdari.
