Gjykata e Apelit ka lënë në fuqi sot vendimin e Gjykatës së Tiranës për dosjen CEZ, e cila kishte vendosur pushimin e saj për mungesë të provave.
Në datën 21 janar, Gjykata vendosi të pushojë çështjen e privatizimit të OSSH nga CEZ me argumentin se nuk kishte elementë të veprave penale për ish-zyrtarët e akuzuar.
Mazhoranca në Kuvend vendosi ta apelojë çështjen por sot ajo sërish është pushuar.
Në një reagim në Facebook, kreu i grupit parlametar socialist, Taulant Balla akuzoi për këtë vendim gjyqtaarët të cilët ende nuk kanë kaluar vetingun dhe paralajmëroi se do të bënte rekurs të çështjes në Gjykatën e Lartë.
“Vendimi i paligjshëm i Gjykatës së Shkallës së Parë, i cili u la sot në fuqi në Apel, do të ankimohet menjëherë.”– shkruan Balla.
Mazhoranca parlamentare pas ardhjes në pushtet në vitin 2013 ngriti një Komision Hetimor Parlamentar të drejtuar nga Taulant Balla, për të hetuar procedurën e privatizimit të OSSH nga çekët e CEZ në 2007.
Hetimet në prokurori zgjatën 3 vite ndërkohë që komisioni parlamentar arriti në konkluzionin se nga procedura e privatizimit të OSSH, shtetit i ishte shkaktuar një dëm prej 414 milionë eurosh.
Personat e akuzuar në lidhje me këtë çështje janë ish-kryeministri Sali Berisha, djali i tij Shkëlzen Berisha, ish-ministri i Ekonomisë Genc Ruli, biznesmeni Nue Kalaj, ish-ministri i Financave, Ridvan Bode, të gjithë anëtarët e Komisionit të Vlerësimit të Ofertave në atë kohë, të gjithë anëtarët e Komisionit të Negocimit të Marrëveshjes me CEZ, dy ish-zv/ministrat e energjetikës dhe transportit, Florion Mima dhe Eno Bozdo, Ledina Mandia, ish Avokate e Shtetit dhe dy ish-kryetarët e ERE, Bujar Nepravishta dhe Sokol Ramadani. /Opinion.al
