Kryeministri Edi Rama nga Himara tha se certifikatat e pronësisë që po shpërndan nuk do të kushtojnë për asnjë banor.
Në fjalën e tij para banorëve, Rama theksoi se 4000 certifikata do jepen brenda vitit.
Ai tha se Himara është çdo ditë në zhvillim, nga i cili do të përfitojnë edhe banorët e vetë zonës.
“Shqiptarëve nuk ua ha qeni shkopin për politikë. Mos bëni pre e këtyre broçkullave. Nuk e do kush Himarën më shumë se ju. Unë jam një nga ju, doni apo nuk doni. Certifikatat sot do i japim. Ai që bërtiti sesa kushtojnë certifikatat, i them se bëjnë zero lekë. Të gjitha falas, pa asnjë kokërr leku, se janë shtëpitë tuaja.
Ne kemi ndërtuar mijëra shtëpi për tërmetin dhe asnjë kokërr leku nuk iu kemi kërkuar atyre që humbën shtëpitë. Janë banesat e tyre dhe të bëjnë çfarë të duan.
Himara ka nevojë për zhvillim. Himara po ngjitet dhe nga ngjitja e saj do të përfitoni më shumë ju. 4000 certifikata do jepen brenda vitit dhe Prefektura është adresa e problemit”, tha Rama.
