Komisioneri për Zgjerim Johannes Hahn ka thënë se në muajin maj Komisioni Europian do të rekomandojë hapjen e negociatave për Shqipërinë dhe Maqedoninë e Veriut. Gjatë fjalës së tij në Komisionit për Punët e Jashtme të Parlamentit Europian, Hahn tha se do të bëhet një rekomandim pozitiv për vendet e Ballkanit perëndimor.
“Bashkimi Europian duhet të fokusohet në perspektivën afatgjatë të vendeve kandidate. Në Komision, në fund të majit do të prezantojmë progresraportet për vendet e rajonit (Ballkani Perëndimor), plus Turqinë. Pres, që mbi bazat e asaj që kemi parë, të bëjmë një rekomandim pozitiv për hapjen e negociatave të anëtarësimit me Maqedoninë dhe Shqipërinë”, ka thënë ai.
Megjithë problematikat dhe situatën e vështirë politike në Shqipëri, Hahn thotë se progresi është i dukshëm. “Në Ballkanin Perëndimor është bërë një progres shumë i rëndësishëm. Në afatgjatë, kur shohim arritjet, është e vërtetë që ka edhe hapa pas, por në afatgjatë vërejmë progres shumë të rëndësishëm në ekonomi, në sundimin e ligjit apo në procesin e ripajtimit”, është shprehur Hahn./Opinion.al
