Komisioneri Shtetëror i Zgjedhjeve, Ilirjan Celibashi ka zhvilluar një takim në KQZ me ministrin për Evropën dhe Punët e Jashtme, Igli Hasani dhe ministrin e Brendshëm Ervin Hoxha.
Lajmi është bërë i ditur nga vetë komisioneri përmes një postimi në rrjete sociale, ku shkruan se diskutuan për koordinimin e angazhimeve respektive për realizimin e votës së diasporës.
“Me Ministrin për Evropën dhe Punët e Jashtme Igli Hasani dhe Ministrin e Brendshëm Ervin Hoxha diskutuam sot në KQZ Shqiperi për koordinimin e angazhimeve respektive për realizimin e votimit nga jashtë.
Ministria e Brendshme ka nisur dhe do të përmirësojë mekanizma që ndihmojnë votuesit nga jashtë për rinovimin e dokumenteve të identifikimit. Më së pari tani votuesit nga jashtë nuk kanë detyrimin për të aplikuar për të dy kategoritë e dokumenteve të identifikimit. Në kuader të këtij procesi janë ulur kostot e këtij shërbimi.
Nga ana tjetër MEPJ ka nisur praktikën e zhvendosjes së shërbimeve konsullore më pranë shtetasve shqiptarë aty ku janë dhe lehtësimit të marrjes së këtyre shërbimeve.
Diskutuam mbi masat që këto dy institucione do të duhet të marrin për të mbështetur veprimin e KQZ në kuadër të realizimit të votimit nga jashtë”, shkruan Celibashi./Opinion.al
