Historiani Neritan Ceka, bazuar në faktet dhe dokumentat mbi vrasjen e Qemal Stafës më 5 maj, ka ngritur dyshime se mund të kemi patur të bëjmë edhe me një vetëvrasje, ndërsa sipas tij, pas vitit 1945, ngjarja u rindërtua nga shteti komunist në formën e një miti.
“Ngjarja është aksidentale, shtëpia nuk ka qenë e rrethuar, shkohet për një verifikim rutinë. Më vonë e gjithë ngjarja është ndërtuar në formën e një miti. Mua më kujtohet që kishte edhe një pikturë që tregonte Qemal Stafën që ndeshej me milicët, pra kanë treguar sikur ai u vra në përpjekje. Në fakt, është vrarë ose është vetëvrarë dhe unë besoj….Në këtë situatë që jetonte rinia komuniste e asaj kohe, që ishte një rini e fanatizuar të them të drejtën, ideali i tyre ishte që të mos dorëzoheshin gjallë tek armiku. Vetëvrasja e justifikon Qemal Stafën, por jo partinë e tij, partia e tij nuk ishte e interesuar të nxirrte një simbol të rinisë që vret veten”, tha Ceka.
942/Dokumenti zyrtar mbi vrasjen e Qemal Stafës – Publikuar nga Kastriot Dervishi
Sipas njoftimit të Mëkëmbësisë të datës 16.3.1942, Qemal Stafa dhe Drita Kosturi ishin kallëzuar penalisht më 15.11.1941 në Gjykatën e Posaçme në Romë për veprimtari komuniste, por me vendimin e datës 22.1.1942 ishin liruar nga akuzat për mungesë provash. Ndërsa njoftimi kryesor mbi vrasjen e Qemal Stafës është i Kuesturës së Tiranës.
***
Tiranë, më 5 maj 1942
Rreth orës 14.00 të datës së sotme, gjatë një operacioni të papritur në një shtëpi që ndodhet në rrugën “Lumi”, në afërsi të kolegjit muhamedan (medrese), e mbajtur me qira prej Beqir Vanit (Beqir Minxhozi-shënim), i arrestuar sot në mëngjes për hetime të policisë, agjentët hasën në qëndresë nga ana e disa personave, të cilët ishin duke u orvatur të iknin për t’i shpëtuar arrestimit.
Janë hedhur tre bomba dore kundër agjentëve, të gjitha shpërthyese, po pa pasojë dhe janë zbrazur shumë fishekë revolveri, gjithashtu pa pasoja.
Agjentët kanë nisur përgjigjen me armë duke vrarë komunistin Qemal Stafa, i të ndjerit Hasan dhe Sabire, lindur në Elbasan, më 10.9.1921, ish student. Janë arrestuar:
1-Drita Kosturi, e Aliut dhe e të ndjerës Nafije, lindur në Lezhë më 12.7.1920, ish studente.
3-Gjustina Sata, bashkëshorte e Zef Ndojës, në lidhje me shënimin nr.2699, të datës 4 të këtij muaji.
4-Marie Lezhja, e Franos dhe Angjelisë, vjeç 19 nga Tirana, të kapura befas në shtëpinë e përmendur duke tentuar të ikin me Qemal Stafën dhe një tjetër person të ikur të panjohur, të paidentifikuar (Kristo Themelko-shënim).
I vdekuri ndodhet i ruajtur në vendin e ngjarjes në pritje të shikimit në vend nga autoritetet përkatëse.
Kuestori Pandeli Papalilo
