Historia e aktorit të njohur Genc Fuga mori vëmendjen e mediave dhe rrjeteve sociale në këto ditë të nxehta vere.
Edhe një herë ajo vërtetoi solidaritetin e shqiptarëve dhe dashamirësinë e tyre, ndaj një çifti të njohur e tepër pozitiv të jetës publike në vend, ndërsa fatkeqësisht nxori zbuluar sistemin tonë publik, i paaftë për t’i ofruar shërbimin e nevojshëm shëndetësor një qytetari, taksapgaues të tij.
Fatmirësisht Eni Jani dhe Genc Fuga gjetën zgjidhje. Alternativa e shpëtimit erdhi nga Spitali Amerikan 3, që kishte kapacitetet, aftësitë dhe mundësitë të ofronte një shërbim që për fat të keq, sistemi ynë publik nuk e ofronte dot. Por çfarë do të ndodhte nëse as Spitali Amerikan nuk do e kishte këtë shërbim? Do të kërkohej një zgjidhje jashtë vendit? Do duhej një transport me avion mjekësor në një spital jashtë? A do të ishte kjo një kosto më e lirë për xhepin e aktorit të njohur apo të cilitdo qytetar që mund të ketë nevoja të ngjashme?
Të mos harrojmë faktorin kohë. Mund të gjendesh me xhepin plot, por koha nuk lejon dhe ka disa ndërhyrje ku koha është vendimtare në fatin që do të ketë pacienti më pas.
Në këtë kontekst, histeria kolektive e shpërthyer ditëve të fundit kundër shërbimit spitalor privat në vend, duket sa e pavend aq edhe dashakeqe.
Të gjithë e kujtojmë fillim e viteve ’90, kur Shqipëria vinte nga një sistem krejtësisht I mbyllur e kur për një mjekim të specializuar, duhej jo vetëm një trajtim jashtë, por edhe një vizë.
Të gjithë kemi patur apo dëgjuar për njerëz që u duhej të udhëtonin drejt Greqisë, Italisë apo Turqisë për një ekzaminim më shumë, për një ndërhyrje më të specializuar apo edhe për ca analiza që nuk bëheshin në vend.
Ndërsa është koha që të gjithë të ngremë zërin e pa më të voglin diskutim të kërkojmë llogari drejt sistemit publik ku derdhim taksa e kërkojmë shërbime, duhet të jemi të kujdesshëm ndaj çdo guri që hedhim ndaj privatit, që është një mundësi më shumë për jetën e çdo qytetari.
Të mos harrojmë se çdo biznes në këtë vend, i cilitdo lloj qoftë ai, ndërmerr iniciativa, rrisqe, punëson njerëz, investon dhe rrit nivelin e shërbimit.
