Partizani nuk do të ketë mundësi të bëjë merkato në 2 sesionet e radhës.
Vendimi i ndërmjetëm u mor nga Gjykata e Arbitrazhit Sportiv më Lozanë dhe u bë me dije nga vetë klubi shqiptar.
Transferimi i Erald Çinarit u vlerësua si i parregullt edhe pse tek klubi i kuq pretendojnë se kanë vepruar gjithmonë drejtë. Partizani siguron se do të vijojnë projektin për sezonin e ardhshëm dhe se do të punojnë për mbrojtjen ligjore dhe synon fitimin e gjyqit para sesionit të ardhshëm të merkatos.
NJOFTIM
Klubi njofton se është njohur sot me vendimin e ndërmjetëm të Gjykatës së Arbitrazhit Sportiv (CAS), i cili lë në fuqi vendimin e Dhomës së Zgjidhjes të Konflikteve të FIFA-s për pezullimin e klubit nga pjesëmarrja në dy sesionet e radhës të merkatos. Duke siguruar sportdashësit dhe opinionin sportiv se Partizani ka vepruar përherë konform të gjitha rregullave dhe legjislacionit sportiv shprehim zhgënjimin tonë mbi këtë vendim që cënon ecurinë tonë në kampionatin që sapo pritet të filloj.
Në arsyetimin e saj CAS ka vlerësuar se pezullimi nga dy sesione të merkatos nuk shkakton dëme të pariparueshme dhe afatgjata ndaj klubit.
Pavarësisht se ky vendim në arsyetimin e tij na pengon në zhvillimin normal të projektit sportiv për sezonin aktual, FK Partizani do të vijojë punën e pandërprerë me gjithë vështirësitë e krijuara duke patur besimin maksimal tek stafi teknik dhe lojtarët aktualë.
Për sa i përket gjyqit në CAS, klubi po punon për të siguruar mbrojtjen ligjore dhe synon fitimin e gjyqit përpara sesionit të ardhshëm të transferimit të lojtarëve.
