Igli Cara, Kandidati i koalicionit opozitar “Bashkë Fitojmë” në Durrës, ka folur në Klan News për programin e tij për qytetin bregdetar.
Cara theksoi se në të gjitha takimet nga afër me qytetarët, problematika është e njëjtë. Sipas tij, durrsakët nuk marrin shërbimet që ju nevojiten dhe bashkia nuk është derë e hapur për ta.
“E gjithë opozita është e bashkuar, në këtë rast dua të falenderoj të gjithë për konsensusin pavarësisht ndasive politike. Qyettarë që deri dje ishin pjesa gri, tanimë është e gatshme që me 14 Maj t’u drejtohet kutive të votimit. Durrësin do ta ndaja në 3 pjesë, pjesa e komunave. Kudo që të shkosh ka një kryefjalë: Ne nuk e ndjejmë bashkinë, s’është e hapur për ne! Pastaj kur futesh te problemet, janë të përbashkëta. Infrastruktura e mangët kudo, uji i pijshëm, investimet në zonë sepse të gjitha ankohen për to. Të gjithë thonë se nuk ka ndriçim, gjelbërim jo e jo. Sa shkon takon qytetarët ndjen të njëjtat probleme dhe më kanë kërkuar një bashki ndryshe.
Sidomos te komunat më kanë thënë na rikthe atë shërbimin që dikur merrnim pranë qendrave administrative. Duan atë familjen e përbashkët sepse pikërisht për këtë paguajnë taksat. Kërkojnë largimin nga politika e madhe dhe kanë parë vetëndërgjegjësim duke thënë të lutem ne duam ato shërbime për të cilat kemi nevojë. Kur flasim për punësimin direkt të shkon mendja te shpopullimi, në bashkëbisedimin më të rinjtë më ka rënduar shprehja “në Durrës nuk ke çfarë bën”. Bashkia duhet të jetë më afër, tregu ka nevojë për të rinj me profesione dhe duhen ofruar këto qendra trajnimi që ata të bëhen gati për tregun e punës, është një proces që do bashkëpunim të gjerë me gjithë tregun e biznesit. Në këto vite kemi pasur studentë ekselentë që kanë gjetur më kollaj të ikin sesa t’i shërbejnë vendit të tyre.”
Cara u shpreh se pas 20 vitesh betonizim, do të bëhet gjithçka për të ndërhyrë në zona të ndryshme dhe për të krijuar shëtitore e gjelbërim.
“Tanimë dihet që në këto 20 vite Durrësi i është nënshtruar betonit, sidomos Durrësi i vjetër dhe kjo vetëm për interes të zotit Dako që kishte një kompani të tij. Për projektet, kuptohet që në rastet ku kemi mundësi të ndërhyjmë për gjelbërim patjetër do e bëjmë. Ka vende që kanë kanale të hapura, do t’i kthejmë në korridore të gjelbërta për shëtitje apo lulishte në Durrës, kemi sistemimin e zonave ndërmjet banesave. Përveç pjesës urbane të lëvizshme, nuk ka parkime të dedikuara apo nëntokësore. Spostimi i terminalit sepse ka vështirësi sepse autobusët nuk kanë një vend që të qëndrojnë sidomos gjatë verës, mbikalimet te Ura e Dajlanit është një vend shumë i mirë. Bashkia pikërisht këtë bën, sistemon. “
Një pikë e veçantë në programin e tij është “Durrësi 15 minuta”.
“Banorët e Spitallës dhe Kënetës nuk e dinë se çfarë do bëhet me pronat e tyre. Për këtë pikë, shërbimet duhen marrë pranë shtëpive të tyre, pra 15 minuta në këmbë, jo një orë me makinë. Njësive administrative do t’u kthehet ai pushtet që kanë pasur dikur. Turistët nuk orientohen dot, mjafton një program soft i cili ka info Durrës dhe aty merren të gjitha të dhënat.”
I pyetur se si do t’i sigurojë paratë për të kryer të gjitha këto ndryshime, Cara u përgjigj: Buxheti i bashkisë, totali i parave dhe grantet duhet të shkojë për qytetarët. 2/3 e buxhetit shkojnë vetëm për dy gjëra. Vetëm duke ulur në atë nivel shpenzimet për trajtimin e mbetjeve ta çojmë në 8%. Trajtimi i mbetjeve në këtë moment na merr 10 miliardë lekë, dhe ne i marrim plehrat siç janë dhe i bëjmë bashkë pavarësisht se është firmosur memorandum për ndarjen dhe pa peshuar fare çohen në incenerim. Që vitin që vjen do krijojmë stacionin e transferimit të mbetjeve para depozitimit në Tiranë, do ulë peshën për incenerim dhe faturën dhe do prodhojë para nga riciklimi. Ja ku i kursyem 5 milionë euro në vit.
