Ministri i Jashtëm në detyrë Gent Cakaj ka deklaruar pas takimit me Ndihmës Sekretarin amerikan të Shtetit në detyrë për Çështjet Evropiane dhe të Azisë se SHBA mbështesin hapjen e negociatave për anëtarësim të Shqipërinë me Bashkimin Europian në tetor.
Në një postim në Facebook, zoti Cakaj ka përshkruar takimin e tij me zotin Philip Reeker. Ai shkruan se për SHBA reforma në drejtësi në Shqipëri “s’mund të jetë subjekt i asnjë kompromisi dhe ajo përbën një model për rajonin dhe përtej”.
Ai shton se ka marrë përgëzime nga zyrtari amerikan për rritjen progresive të buxhetit të mbrojtjes së Shqipërisë dhe ka inkurajuar arritjen e objektivit prej 2% të shpenzimeve të buxhetit të mbrojtjes deri në 2024.
Ndër të tjera, ministri në detyrë shkruan se në takim u nënvizua “marrëdhënia e shkëlqyer” e Shqipërisë me SHBA dhe “rëndësia e konsolidimit të mëtejmë të bashkëpunimit rajonal”.
“ShBA-të janë referenca e pazëvendësueshme dhe e patjetërsueshme e politikës së jashtme të Shqipërisë” mbyll postimin e tij Cakaj. /Opinion.al
