Ministri në Detyrë i Punëve të Jashtme, Gent Cakaj zhvilloi vizitën e parë jashtë vendit si përfaqësues i diplomacisë shqiptare. Ai mori pjesë në takimin e Ministrave të Punëve të Jashtme të vendeve anëtare të Bashkimit Evropian dhe vendeve kandidate. Në njoftimin zyrtar thuhet se takimi u zhvillua në Bukuresht, në kuadër të Presidencës rumune të Këshillit të Ministrave të BE-së.
Cakaj foli për rrugën e integrimit evropian të Shqipërisë, duke theksuar përpjekjet e deritanishme në këtë proces.
“Ministri në detyrë Cakaj, pasi vlerësoi mbështetjen e vendeve anëtare të BE-së në rrugën e integrimit evropian të Shqipërisë, vuri në dukje përpjekjet dhe arritjet e deritanishme në këtë proces, duke shprehur angazhimin e vendosur për forcimin e tyre, si edhe pritshmëritë tona që bisedimet e anëtarësimit të jenë njohje e arritjeve dhe mekanizëm për orientimin e tyre të ardhshëm.
Ai evidentoi gjithashtu rolin proaktiv e konstruktiv të Shqipërisë si faktor stabiliteti në rajon, duke shtuar se në aspektin global, vendi ynë dëshmon me vendosmëri orientimin e tij strategjik euroatlantik dhe linjëzim të plotë me politikën e jashtme dhe të sigurisë të BE-së”, thuhet në njoftim.
/Ri.De
