“Një çështje logjistike” e ka konsideruar ministri i Jashtëm në Detyrë Gent Cakaj vendimin e Këshillit të Evropës për të mos dërguar delegacion vëzhgues në zgjedhjet e 30 qershorit. Sipas Cakajt Shqipëria do të shkojë në zgjedhjet e 30 qershorit e mbështetur nga aktorë të tjerë ndërkombëtarë me rëndësi.
Ai nuk e komentoi këtë veprim të Këshillit të Evropës dhe theksoi se zgjedhjet e 30 qershorit janë tërësisht të mbështetura në Kushtetutë.
“Nuk më takon të komentojë mbi problematikat logjistike të organizatave që nuk mund të vijnë në Shqipëri, por më takon të them që zgjedhjet e 30 qershorit përveç se të bazuara në kushtetutë janë të mbështetura nga të gjithë aktorët ndërkombëtarë”, deklaroi ministri Cakaj.
Përsa i përket deklaratave të fundit të Presidentit Meta, ai zgjodhi të mos jepte një koment por u shpreh kritik ndaj atyre institucioneve të cilat mund të cënojnë suksesin sipas tij ‘të pa diskutueshëm’ drejt integrimit.
Më herët ditën e sotme Këshilli i Evropës lajmëroi se ka anuluar dërgimin e një delegacioni për vëzhgimin e zgjedhjeve lokale të 30 qershorit. Sipas njoftimit ky vendim është marrë për shkak të rreziqeve të mundshme të sigurisë në zona të caktuara, si edhe paqartësisë në lidhje me organizimin e zgjedhjeve vendore.
Një reagim në lidhje me këtë vendim ka dhënë më herët edhe zëvendës ministri i Mbrojtjes, Petro Koci i cili deklaroi në Facebook se Këshilli i Evropës është një organizatë në të cilën sapo është rikthyer Rusia. Ende nuk është e qartë nëse zëvendës ministri ka dashur të nënkuptojë se vendimi i sotëm i këshillit është influencuar nga Rusia.
Kreu i opozitës Basha dhe kryeministri Rama gjithashtu kanë shkëmbyer deklarata në distancë në lidhje me këtë ngjarje. Sipas Bashës ky vendim është i frymëzuar politikisht për të dërguar një mesazh të qartë se zgjedhjet e 30 qershorit janë jo të ligjshme. Ndërsa Rama e ka thënë se ky nuk është një vendim politik dhe se e vërteta do të dalë shumë shpejtë. /Opinion.al
