Ministri i Jashtëm në detyrë Gent Cakaj ka dhënë sot një deklaratë për mediat në lidhje me vendimin e Këshillit Evropian për të mos dërguar vëzhgues në zgjedhjet e 30 qershorit.
Sipas Cakaj nuk kemi të bëjmë me një qëndrim zyrtar të KiE por me deklaratën e një grupi këshillues brenda saj. Përsa i përket qëndrimit të Kongresit ai thekson se është e rëndësishme që ata nuk janë shprehur kundër legjitimitetit të zgjedhjeve.
Cakaj ka cilësuar se opozita po tenton në mënyrë dashakeqe të bëjë fushatë kundër zgjedhjeve duke përdorur vendimin e Kongresit të autoriteteve vendore.
“Tre ditë para zgjedhjeve vendore, dy grupe kundër reformës në drejtësi, një parti që ka humbur cilësinë demokratike kanë ndërmarrë një fushatë sikur KiE është kundër zgjedhjeve.
Ky qëndrim nuk ka lidhje me realitetin dhe të vërtetën. Komunikimi nuk përbën qëndrim zyrtar të KiE. Kongresi i autoritetit lokal dhe rajonal ndryshe nga Këshilli i Ministrave është një institucion këshillues brenda tij. Sidoqoftë edhe vetë Kongresi nuk ka dhënë ndonjë deklaratë në mohim të së drejtës për mbajtjen e zgjedhjeve. Kongresi nuk bën asnjë deklaratë për ligjshmërinë e këtyre zgjedhjeve. Kjo shfaqje paditurie elementare dhe dashakeqësi me një përpjekje për të deligjitimuar procesin zgjedhor.
Dhuna deri sot është ushtruar qartazi nga opozita kundër parlamentit. Protestat e opozitës së bashkuar kundër reformës në drejtësi dhe hapjes së negociatave kanë treguar se në rast se ka vullnet për ta ndalur dhunën, dhuna ndalet me njëherë. Por rreziku vjen nga vetë strukturat e partive në fjalë. Çfarëdo thirrje në deklaratën e Kongresit duhet të shohin veten në pasqyrë. Sot KiE ka folur zyrtarisht se zgjedhjet duhet të mbahen më 30 qershor në përputhje me legjislacionin”, u shpreh Cakaj. /Opinion.al
