Ish-kryeministri, Sali Berisha, ditën e sotme nga çadra e protestës i ka kërkuar kryeministrit Edi Rama të japë dorëheqjen dhe të pranojë një qeveri teknike.
“Më mirë dorëzohu dhe prano qeverinë teknike, hapi rrugën vendit dhe të ecim përpara. Leri përpjekjet, ti je peng i krimit”, tha Berisha.
Për ish-kryeministrin, vota e lirë, është themeli i një shoqërie të lirë. Gjatë fjalës së tij, ai, përshëndeti të gjithë qytetarët që janë në çadër prej disa javësh.
“Le t’i bëjmë thirrje Edvin Kristaq Ramës, në të ka mbetur dhe një gram arsye hape rrugën kjo është e jona, beteja për votën. Nuk është betejë për pushtet, pasi pushtetin do ta vendosin shqiptarët në zgjedhje. Mblidhi këtu në kryeministri të gjithë vrasësit, pengmarrësit e Shqipërisë. Më mirë dorëzohu dhe prano qeverinë teknike, hapi rrugën vendit dhe të ecim përpara. Leri përpjekjet, ti je peng i krimit. Vëllezër dhe motra a e dëgjuat akuzën që i bëri Tahiri Ramës, “se tek Balili nuk jam unë, por ti Edi Rama’. Dhe është e vërtetë. Prandaj më mirë thirri arsyes, çadra është çadër lirie, paqeje, dëgjoji këto dhe largohu. Largimi i mazhorancës së qelbësirave e bazuar mbi drogën, krimin dhe vjedhjen e qytetarëve është fati i pashmangshëm”
