Kuvendi miratoi dje nen për nen buxhetin për vitin 2020 por sipas ish-deputetes Jorida Tabaku ai nuk përmbush asnjë kërkesë ose domosdoshmëri për bizneset të cilat janë prekur nga tërmeti.
Në një reagim në Facebook, Tabaku shkruan se buxheti nuk planifikon asnjë ndërhyrje në infrastrukturë dhe asnjë shërbim shtesë por mbetet i përqendruar në dhënien e koncesioneve dhe tenderëve.
Ajo bën apel për zonën e Kombinatit, e cila është më e prekura në kryeqytet nga tërmeti i 26 nëntorit.
“Kombinati është sot zonë e harruar nga qeveria, si shumica e Shqipërisë, ndonëse mazhoranca e konsideron bastion të sajin ajo është zhdukur në ditët e hallit të kësaj zone. Bizneset janë të varfër dhe pa shpresë, i gjithë blloku po largohet ndërkohë që pjesa e mbetur ka frikë se qeveria do t’u prishë shtëpitë për të ndërtuar aty oligarkët. Buxheti 2020 nuk ka asnjë rresht dhe asnjë shifër për rindërtimin e kësaj zone, por ai do përdorë çdo burim ekonomik dhe taksat e qytetarëve për të pasuruar një pakice.”, shkruan Tabaku.
Ish-deputetja thotë se Partia Demokratike ka një plan për rimëkëmbjen e ekonomisë. Ky plan përfshin taksa më të ulëta, investime në infrastrukturë por dhe “hetim të çdo kontrate abuzive PPP” në mënyrë që “Paratë e buxhetit që harxhohen për këto qoka do të kalojnë në shërbim të ekonomisë, qytetarëve dhe stimul për ekonominë.” /Opinion.al
