Kryetarja e Komisionit të Ligjeve, Klotilda Bushka ka folur në mbledhjen e Grupit Parlamentar të PS, për përfshirjen e saj në dosjen ndaj kryetarit të bashkisë së Tiranës, Erion Veliaj.
Bushka ka pohuar se Ina Goxhaj është kushërira e saj dhe se nuk ka tentuar asnjëherë që të fshehtë të vërtetën.
Ajo thotë se si juriste i ka sqaruar të drejtat e saj dhe nuk e ka penguar të thotë të vërtetën.
“Sa i përket pretendimit për pengim të së vërtetës. E kam takuar vajzën në fjalë si person me të cilin kam punuar dikur dhe kam lidhje gjaku. Ina Goxhaj është kushërira e imja. E kam qetësuar duke e këshilluar të thotë të vërtetën dhe nëse e gjykon të nevojshme të marrë avokat. Si juriste i kam sqaruar të drejtat e saj. Vetëm kaq.
Nuk e kam penguar të thotë asgjë dhe as nuk kam tentuar që të fsheh ndonjë të vërtetë se jam e para që jam e interesuar që e vërteta të zbardhet sa më parë. E kam kritikuar kushërirën time për faktin se adresa e organizats ku ka qenë drejtoreshë nuk ishte ndryshuar që nga 2017 dhe pse e kisha kërkuar disa herë. Nuk di çfarë ka ndodhur në prokurori apo çfarë presioni mund të ketë ndjerë kushërira ime që në deklaratat private e ka sjellë në një kontekst tjetër.
Nuk jam thirrur për të rrëfyer këtë të vërtetë, kam mësuar se jam në hetim se jam në hetim nga shtypi. Nuk jam thirrur apo dëgjuar ndonjëherë apo më është dhënë mundësia të ballafaqoj komunikime të të tretëve ku përmendet emri por kur unë vetë nuk jam pjesë fare”, u shpreh Bushka.
