Kryetari socialist Edi Rama në një dalje mediatike iu është përgjigjur pyetjeve të gazetarëve lidhur me përbërjen e listave. Duke folur për lënien jashtë tyre të ish-ministrit Ditmir Bushati, Rama tha ndër të tjera se çfarë ka përcaktuar këtë vendim nuk ka qenë një konflikt mes tyre.
Rama la të kuptojë se Bushati nuk ka qenë i angazhuar në aktivitetin e partisë në Shkodër, duke u shprehur se pas largimit si ministër vendosi vetë të zbresë nga treni.
“Shokët e Ditmir Bushatit sot janë te kufiri, dhe jo sepse nuk kanë bërë debate me mua, por sepse ata, përveç punës si ministra, kanë punuar tokën, kanë mbjellë dhe kanë kultivuar në terren, me njerëzit përditë, të korrurat e 25 prillit. Ndërsa Ditmir Bushati, ditën e parë që u ndryshua si drejtues i Shkodrës ka zbritur nga treni, nuk është shfaqur më në asnjë aktivitet, nga ato që nuk janë puna juaj, nuk janë televizive, por janë pjesë e pandalshme e punës”, tha Rama i pyetur nga mediat.
“Ai ka disa mendime të tijat, me të cilat unë s’jam dakord. Nëse do të kishte punuar tokën, do të ishte njësoj si shokët e vet. Madje edhe shumë nga ato që thotë, s’do t’i thoshte fare”, vijoi ai.
Kryetari socialist u shpreh se Bushati ka qenë një nga investimet e tij politike dhe shpreson që në të ardhmen ai ta kapë trenin prapë.
“Bushati është një nga investimet e mia të rëndësishme nga pikëpamja politike, morale njerëzoreë dhe është që njeri që e ndiej njeriun tim edhe sot. Shpresoj që ta kapi trenin prapë. Ja kam bërë të qratë të gjithëve. Partia të vë, por nuk të mban, mban veten. Në tren të fut partia, mbase dhe unë në një moment mund të të hipi në tren, por nëse rri apo zbret nga treni, e vendos vetë”, tha Rama./Opinion.al
