Ministri i jashtëm Ditmir Bushati ka folur sot para mediave lidhur me negociatat me Greqinë, ku është shprehur se ende diskutimi mbetet në planin teknik.
Bushati tha se nuk ka vend që të flasim për strukturim kufijsh, dhe se pala shqiptare i ka të përcaktuara vijat e kuqe, nga vendimi që ka dhënë Gjykata Kushtetuese.
Deklarata e Bushatit:
Ështe e qartë se ka një tentativë për ta mbajtur nën tension këtë marrëdhënie, ne jemi të vendosur që ta çojmë këtë çështje përpara. Në rastin e Shqipërisë ne kemi një plus në krahasim me Greqinë, pasi më herët Kushtetuesja i ka vendosur vijat e kuqe.
Duhet të jemi realistë, vijat e kuqe të Kushtetutës janë detyruese për ne dhe jo për Greqinë dhe pretendimet e tyre. Nuk ka vend për të folur për ristrukturimin të kufijve, e kemi thënë ne, e ka thënë dhe Komisioni Evropian.
Në momentin që do të mbyllen negociatat në planin teknik, ne do i kërkojmë autorizim zotit president për firmosjen e marrëveshjes. Ndryshe nga sa thuhet në media, nuk ka ende një marrëveshje, dhe nuk mund të jap një datë finale.
