Ditmir Bushati, ish-ministri i Punëve të Jashtme, ka folur në lidhje me situatën politike në vend, si dhe ka bërë dhe një analizë të ngjarjeve të ndodhura gjatë vitit 2019.
Bushati është shprehur gjatë një interviste për “Zërin e Amerikës”, se 2019 ishte një vit i mbrapshtë, ndërsa thekson që 2020 të jetë viti i reflektimit.
Ish-ministri ka thënë se në vitin e ardhshëm duhet ndërtuar një kulturë e re politike, përfshi maxhorancën që ka peshën më të madhe të bashkëpunimit.
“Ne jemi në fazën e një diskutimi në Kuvend, por në finale ka mbizotëruar një sens më racional duke marrë parasysh propozimet e BE-së dhe OSBE-së. Sepse Shqipëria ka marrë kryesimin e Presidencës së OSBE-së dhe liria e medias është një nga shtyllat kryesore të kësaj organizate. 2019 ishte një vit i mbrapshtë. Nisi me djegien e mandateve, më pas zgjedhjet e 30 qershorit, tërmetet që prekën vendin. Uroj që 2020 të jetë jo thjeshtë viti i reflektimit, por edhe bashkëpunimit, për ti dhënë jetë reformës në drejtësi. Qëllimi i saj nuk ishte thjeshtë spastrimi i atyre personave të papërshtatshëm për drejtësinë. Ne duhet të ndërtojmë një proces dhe një kulturë të re politike, ku ne si maxhorancë kemi peshën tonë për të shtrirë dorën e bashkëpunimit”, tha Bushati./ Opinion.al
