FIER- Një 60-vjeçar në qytetin e Fierit ka vrarë me armë të ftohta bashkëshorten dhe ka fshehur krimin, duke jetuar në një shtëpi me kufomën per ditë. Ngjarja jo e zakontë ka ndodhur në lagjen nr.1 të qytetit të Fierit. Ka qenë vajza e çiftit e cila studion në Tiranë që ka zbuluar krimin kur është kthyer pranë familjes në fundjavë.
60 vjeçarja Antigoni Fili është qëlluar me sende të forta në kokë dhe trupt nga bashkëshorti. Ngjarja ka ndodhur mbrëmjen e së enjtes por është mësuar vetëm pasditen e së premtes. Policia arrestoi Arqile Filin si autor të kësaj ngjarje të rëndë. 62 – vjeçari mësohet se e ka kryer krimin nën efektin e alkoolit. Vetë autori ka dhënë në polici se sherri kishte nisur pasi i kishte kërkuar lekë gruas për të pirë alkool me shokët, ndërsa ka shfaqur pendesë për krimin.
Burimet bëjnë të ditur se ai kishte punuar si elektriçist por e kishin pushuar nga puna para disa muajsh. Papunësia dhe gjendja e vështirë ekonomike kanë qenë gjithnjë motiv për zënka mes çiftit. Gruaja shiste në një tezge të vogël në treg, për të mbajtur familjen. Dy fëmijët nuk gjendeshin në shtëpi. Djali kishte emigruar në Greqi, por është kapur nga policia dhe ndodhet në burg, ndërsa vajza ndiqte studimet në Tiranë.
