Askush nuk mund ta harrojë Saimir Tahirin mbrëmjen e 19 Tetorit kur shfaq në studion e “Opinion” me sytë e përlotur kur deklaronte: Unë po shkoj në burg…! Askush nuk do të harrojë deklaratat e tij: Se në këtë betejë është për veten, të birin, familjen. Për të vertetën e madhe…
Por nga ajo e ditë e deri më sot kemi parë një Saimir Tahiri tjetër. Pasi partia e tij vendosi të mos i heqë imunitetin, pra të mos e çojë të burg (të paktën për momentin) ai ka marrë revansh ndaj prokurorisë dhe medias. Madje kërcënoi edhe Ramën kur tha se “asnjeri s’mund më të përjashtojë nga PS”. Me një shkresë në dorë, Tahiri pretendoi se Prokuroria e Katalias nuk po e procedon penalisht. Në fakt këtë nuk e ka pretenduar askush deri më sot. Ajo ç’ka ka dalë në media janë disa përgjime të bandës së Habilajve ku përmendet emri i tij si dhe fakti se makina e ish-ministrit u është shitur Habilajve dhe më pas është përdorur sërish prej tij.
Sot me këtë letër në dorë Saimir Tahiri pretendoi se hetimi dhe kërkesa për arrestim nga ana e prokurorisë shqiptare nuk qendron.
“Jam i hapur për çdo hetim, do rri te dera e Prokurorisë së Krimeve të Rënda deri sa të hetojnë për mua. Ç’a është kjo futu njëherë në burg pastaj të hetojmë për ty? Çdo bandë ngjan amatore para asaj që është në politikë”, u shpreh ai.
Pra sipas Tahirit: Prokuroria mund ta hetojë por për këtë nuk u shpreh i gatshëm të lëshonte imunitetin e deputetit.
Për këtë vlen të kujtohet edhe deklarata e tij e para një jave, kur thoshte se “jam gati të hetohem si qytetar i lirë”.
Pyetja që shtrohet sot është: Nëse Tahiri do të kishte qenë njëri nga NE a do të ishte sot në paraburgim apo duke dhënë deklarata për mediat?!
/Opinion.al
