Ngjarja e një viti më parë në Kamëz, ku mbeti i vrarë Agim Buçi dhe u plagos bashkëshortja e tij Rita Buçi, është mbyllur nga Gjykata e Tiranës duke dhënë përkatësisht dënim me burgim të përjetshëm dhe 26 vite burg përkatësisht për dy autorët.
Fajtorë për këtë ngjarje u shpallën Rruzhdi Hoda dhe Vladimir Kurti. Gjatë një grabitjeje në një dyqan në Kamëz njëri prej tyre qëlloi për vdekjen Agim Buçin dhe la të plagosur bashkëshorten e tij. E gjithë kjo ngjarje ka ndodhur në sy të djalit të vogël të çiftit Buçi. Autorët e pranuan grabitjen por mes tyre përçarja nisi përsa i përket faktit se kush kishte qëlluar me armë zjarri.
Vladimir Kurti është shpallur fajtor për vrasjen dhe është dënuar me burgim të përjetshëm. Provat kyçe që inkriminojnë atë janë dëshmia e Rita Bucit dhe pamjet e kamerës së sigurisë.
Ashtu si në kamerat e sigurisë, por edhe nga dëshmia e bashkëshortes së Agim Buçit, Rita Buçi, personi më i shkurtër nga dy grabitësit mbante në dorë një armë zjarri, kjo e konstatuar edhe nga kamerat e sigurisë.
Të dy autorët janë kapur duke biseduar për këtë ngjarje në përgjime ambientale ku kanë pranuar krimin dhe mënyrat se si do të përpiqeshin ta fshihnin atë. /Opinion.al
