Raketa e re ndërkontinentale 9M730 Burevestnik me fuqi bërthamore, e testuar ditët e fundit nga Moska, ka një emër pothuajse romantik: Burevestnik në rusisht do të thotë “zog i stuhisë”. Por, pavarësisht emrit të saj, ajo është një armë vdekjeprurëse, që premton saktësi kundër objektivave shumë të mbrojtura, në çfarëdo distance. Një armë, të cilën Vladimir Putin e përshkroi me krenari si “të pakrahasueshme në botë”.
Sistemi i Shtytjes Bërthamore
Super raketa është një armë e lëshuar nga toka në lartësi të ulët, e aftë të mbajë koka bërthamore dhe e ushqyer nga energjia bërthamore. Është pikërisht ky sistem shtytës bërthamor që i lejon asaj të udhëtojë në distanca më të mëdha. NATO e quan atë SSC-X-9 Skyfall. Rusët pretendojnë se jo vetëm që ka një rreze veprimi të pakufizuar, por mund të shmangë edhe mbrojtjet. Duke vepruar në lartësi të ulëta, midis 50 dhe 100 metrave, është më e vështirë për t’u zbuluar nga radari. Shefi i Shtabit të Përgjithshëm rus, Valery Gerasimov, tha se më 21 tetor, kur u testua më në fund, Burevestnik mbuloi një distancë prej 14,000 kilometrash në 15 orë. Karakteristikat teknike i lejojnë asaj të godasë “objektiva shumë të mbrojtura në çdo distancë me saktësi të garantuar”, duke anashkaluar “sistemet anti-raketore dhe të mbrojtjes ajrore”, shtoi ai.
Rreze veprimi deri në 20,000 kilometra
Instituti Ndërkombëtar për Studime Strategjike, grupi britanik i ekspertëve, ka spekuluar se Burevestnik mund të ketë një rreze veprimi deri në 20,000 kilometra, gjë që do t’i lejonte asaj të godiste objektiva në Shtetet e Bashkuara nga disa vende ruse. Sipas Iniciativës së Kërcënimit Bërthamor, një grup avokatie i përqendruar në uljen e rreziqeve bërthamore, Burevestnik mund të qëndrojë në ajër për ditë të tëra, duke lëshuar koka bërthamore në mënyrë të paparashikueshme. Putini, urdhëroi përgatitjen e “infrastrukturës për ta vënë këtë armë në shërbim të forcave të armatosura ruse”. Në vitin 2024, studiuesit amerikanë identifikuan një strukturë magazinimi bërthamor në veri të Moskës si një vend të mundshëm vendosjeje për raketën.
Dështimet në testimet e mëparshme
Megjithatë, disa ekspertë theksojnë se shpejtësia subsonike e raketës mund të rrisë ndjeshmërinë e saj sa më gjatë që ajo të qëndrojë lart, dhe se ajo mund të paraqesë rreziqe rrezatimi gjatë fluturimit. Zhvillimi i vetë superraketës nuk ka qenë pa gabime. Në vitin 2019, pesë persona vdiqën ndërsa përpiqeshin ta nxrrnin nga fundi i detit, ku kishte humbur gjatë një prove të dështuar.
