Një bunker që po ndërtohet në mes të Tiranës, ka ngjalllur reagime shumë të forta edhe te personazhet publik. Aktori dhe humoristi Julian Deda, ka shprehur indinjatën e tij për këtë objekt që të rikthen vëmendjen tek diktatura komuniste. Duke e konsideruar këtë ndërtim si mjaft cinik dhe të pakuptimtë Deda shkruan këtë status në Facebook:
“ Ky është projekti më cinik dhe më keqdashës që është ndërtuar ndonjëherë. Bunkeri, simboli i diktaturës komuniste afër dy ministrive, afër Teatrit Kombëtar, në mes të Kryeqytetit, në mes të Shqipërisë. Po çfarë doni të thoni me këtë o të mjerë? Ku është morali i kësaj që po bëni? Doni ti rikujtoni njerëzve kohën më të zezë të historisë së tyre? Apo ndoshta doni të tërhiqni vëmendjen nga ndonjë skandal shtetëror i rradhës?! A ju vjen turp që ndertoni objekte të tilla që ngjallin urrejtje, trishtim dhe dhimbje për njerëzit?!?! Duhet të jesh shumë i pashpirt dhe i pandërgjegjshëm të përmendesh litarin në shtëpinë e të varurit ose të përmendesh ujin në shtëpinë e të mbyturit dhe ju e dini fare mirë sa të varur dhe të mbytur ka nga diktatura në këtë vend. Nese ju duket ekzotike të torturoni mendërisht dhe shpirtërisht njerëzit e dërrmuar nga sistemi që ngriten baballarët tuaj, do ishte më mirë të dilnit hapur dhe ta pranoni, siç edhe e kanë bërë disa prej jush, e jo të fshiheni pas simbolikave cinike dhe tinzare…! P.s. Fali Zot, edhe pse dinë mirë ç’ndërtojnë!”
