Bullgaria aprovoi sot ndryshimet në Kodin Penal dhe në ligjin për mbrojtje nga dhuna në familje.
Parlamenti bullgar miratoi me 144 vota “pro” ndryshimet në këtë ligj, pas një rasti tronditës të dhunës ndaj një vajze 18-vjeçare, i cili nxiti protesta masive.
Këto ndryshime sigurojnë të drejtën për mbrojtje për njerëzit të cilët kanë përjetuar dhunë në marrëdhënie intime, apo për viktimat e dhunës të cilat as nuk janë të martuara me abuzuesin e tyre të mundshëm e as nuk janë në një lidhje dashurie.
Pas rastit të 18-vjeçares Debora nga Stara Zagora, deputetët janë mbledhur në një seancë të jashtëzakonshme për të votuar ndryshimet në Ligjin për Mbrojtjen nga Dhuna në Familje dhe Kodin Penal. Propozimi i GERB-SDS, PP-DB dhe DPS për përfshirjen e personave që janë në marrëdhënie intime brenda fushëveprimit të Ligjit për Mbrojtjen nga Dhuna në Familje shkaktoi debate të gjera, si në mbledhjen e komisionit ligjor ashtu edhe në seancën plenare të sotme.
Mijërat njerëz protestuan në Sofje dhe në qytetet e tjera bullgare, pasi një grua nga qendra e qytetit Stara Zagora u rrah dhe u ther me thikë nga i dashuri i saj.
Ky incident ishte bërë publik më 28 korrik, vetëm pasi familja kishte shprehur zemërimin me ritmin e ngadaltë të hetimeve.
Protestuesit e zemëruar bënë thirrje për ndryshimin e legjislacionit dhe për përmirësimin e masave mbrojtëse për gratë, duke bartur banerë me mbishkrimin: “Asnjë grua tjetër më shumë”.
