Presidenti Meta ka njoftuar se ka takuar sot Guvernatorin e Bankës së Shqipërisë, Gent Sejko.
Gjatë takimit, presidenti thotë se është informuar se pavarësishtë situatës së krijuar nga koronavirusi, gjendja e sektorit bankar vijon të mbetet e qëndrueshme dhe se janë marrë masat për të shmangur efektet negative
“Sot prita në takim, me kërkesën time, Guvernatorin e Bankës së Shqipërisë, z. Gent Sejko, për të diskutuar në lidhje me situatën e re të krijuar si pasojë e pandemisë së COVID 19, si dhe efektet e mundshme në ekonominë e vendit dhe në sektorin bankar. U informova nga Guvernatori Sejko se gjendja e sektorit bankar vazhdon të jetë likuide dhe e mirëkapitalizuar dhe se janë marrë të gjitha masat për një vazhdimësi normale të aktivitetit operacional me klientët. Duke vlerësuar punën e Bankës së Shqipërisë, shpreh besimin se do të merren në kohë të gjitha masat e nevojshme për të shmangur efektet negative, si në sektorin bankar, ashtu edhe në stabilitetin makro-ekonomik të vendit”, thotë Presidenti.
Ndërkohë Këshilli Mbikqyrës i Bankës së Shqipërisë ka miratuar sot vendimin për shtyrjen me tre muaj të shlyerjes së kësteve të kredive për të gjithë bizneset dhe individët. /Opinion.al
