Ekonomia shqiptare vijon të jetë solide dhe me tregues pozitiv muajt e fundit sipas Bankës së Shqipërisë. Kjo vihet re edhe në Treguesin e Ndjesisë Ekonomike në muajin maj që u rrit me 1.1% ose duke qëndruar 8.9% mbi mesataren historike. Rritja e këtij indikatori ekonomik sipas Bankës Qendrore u reflektua nga përmirësimi i besimit në sektorin e industrisë dhe të shërbimeve.
Me konkretisht Treguesi i Besimit të Industrisë u rrit me 8% gjatë muajit të kaluar dhe niveli i tij është përsëri mbi mesataren historike me rreth 7.8 pikë përqindje. Këto vlera përcaktuan nga vlerësimet optimiste për kontratat porositëse të bizneseve nga eksportet dhe prodhimi industrial aktual.
Sipas Bankës së Shqipërisë rritje shënoi gjatë majit edhe Treguesi i Besimit në Shërbime me 2.2%, i cili lidhet edhe me sektorin e turizmit, si një nga kontribuesit më të mëdhenjtë të ekonomisë.
“Përmirësimi i Besimit në Shërbime u përcaktua nga vlerësimet më pozitive të bizneseve për ecurinë aktuale të aktivitetit të tyre dhe për nivelin e kërkesës”, thuhet në raportin e Bankës së Shqipërisë.
Nga ana tjetër Treguesi i Besimit Konsumator ruajti të njëjtin nivel në muajt prill dhe maj duke qëndruar në rreth 2.4%. Referuar të statistikave zyrtare të Bankës së Shqipërisë vlera negative muajin që lamë pas shënuan Treguesi i Besimit në Ndërtim që ra me 3.4% dhe me 1.8% Treguesi i Besimit në Tregti.
