Në një ekonomi që përballet me sfida të vazhdueshme, pasuria e familjeve mbetet një tregues i rëndësishëm jo vetëm për mirëqenien, por edhe për sigurinë financiare të së ardhmes.
Të dhënat më të fundit nga Banka e Shqipërisë tregojnë një realitet të dyfishtë: nga njëra anë, një përqendrim i lartë në pronat e paluajtshme; nga ana tjetër, një ulje në zotërimin e llogarive bankare.
Referuar të dhënave rreth 95% e familjeve shqiptare deklarojnë se zotërojnë të paktën një pronë, kryesisht banesa, ndërkohë që 1 në 20 familje nuk ka asnjë pronë në pronësi. Pjesa më e madhe, rreth 93% e familjeve, kufizohen në 1-2 prona, që shpesh janë rezultat i trashëgimisë ose investimeve të hershme.
Sa u takon pasurive financiare, panorama ndryshon. Vetëm 61% e familjeve që kanë investime, i mbajnë ato në formë depozitash ose llogarish bankare, një rënie kjo prej 8 pikë përqindjeje krahasuar me një vit më parë.
Ekspertët paralajmërojnë se ky përqendrim i tepruar në pasuri të paluajtshme dhe mungesa e diversifikimit financiar mund ta bëjë sistemin familjar më të brishtë përballë krizave ekonomike.
Tv Klan
