Britania e Madhe si pjesë e masave të saj globale kundër korrupsionit, ka vendosur sanksione ndaj nënkryetarit të Listës Serbe, Milan Radoiçiç.
Milan Radoiçiç, një biznesmen nga industria e ndërtimit, thuhet se “ka përfituar nga përvetësimi i kontratave shtetërore dhe ka përdorur ndikimin e tij për t’u dhënë kontrata fitimprurëse kompanive të tij të ndërtimit”.
Gjithashtu, është sanksionuar edhe biznesmeni Zvonko Veselinoviç dhe Slobodan Teshiç.
“Zvonko Veselinoviç, biznesmen në industrinë e ndërtimit në Kosovë, shfrytëzon kontratat publike për të përvetësuar fondet shtetërore”, thuhet në shpjegim.
“Slobodan Teshiç, një tregtar i njohur armësh nga Serbia, akuzohet për ryshfet ndaj kryeprokurorit të shtetit të një vendi tjetër”, thuhet në shpjegim.
Në mesin e pesë të huajve që janë sanksionuar për vepra kundër korrupsionit janë Ilan Shor, kryetar i partisë Shor në Moldavi, i dyshuar për përfshirje në skandalin e mashtrimit në një bankë moldave në vitin 2014 dhe Vladimir Plahotniuç, një biznesmen dhe ish-politikan i arratisur nga drejtësia moldave, i përfshirë në sekuestrim dhe korrupsion në institucionet shtetërore të Moldavisë.
