Të dhënat tregojnë se Britania e ka kaluar pikun e pandemisë së koronavirusit por zëvendësi i këshilltarit të lartë të mjeksisë, Jonathan Van-Tam tha se duhen numra edhe më të ulët për të lehtësuar masat.
“Tani është shumë e qartë nga të dhënat se ne jemi duke kaluar kulmin,” tha Van-Tam në një konferencë për shtyp. “Rastet e reja duhet të zbresin më tej … ne duhet të ulim rastet”.
Qeveria britanike ka vendosur pesë teste që duhet të përmbushen para se të fillojë të lehtësojë bllokimin që ka filluar në 23 mars.
Një nga pesë testet është se duhet të ketë të dhëna të besueshme që tregojnë se shkalla e infeksionit po zvogëlohet në nivele të menaxhueshme në të gjithë vendin.
Gjatë 24 orëve të fundit vendi raportoi 3,985 raste të reja, shifra më e vogël që prej 7 prillit. Edhe më e mirë paraqitet situata për numrin e vdekjeve pasi u regjistrua numri më i ulët që prej 29 Marsit, 288.
Aktualisht Britania ka 190,584 raste të prekura me koronavirus nga të cilët 28,734 kanë rezultuar në vdekje. /Opinion.al
