Britania shpalli këtë të dielë se do të japë 200 milionë paund (248 milionë dollarë) për Organizatën Botërore të Shëndetit dhe për të ndihmuar në ngadalësimin e përhapjes së koronavirusit në vendet e rrezikuara dhe kështu të ndihmojnë në parandalimin e një valë të dytë të infeksioneve.
Më shumë se 1.6 milion njerëz raportohet të jenë infektuar nga koronavirusi i ri globalisht dhe vdekjet kanë tejkaluar 100,000.
Infeksionet janë raportuar në 210 vende qëkurse rastet e para u identifikuan në Kinë në dhjetor të vitit të kaluar dhe ministrja e ndihmës britanike Anne-Marie Trevelyan tha që të ndihmosh kombet më të varfra tani do të ndihmojë në parandalimin e kthimit të virusit në Mbretërinë e Bashkuar.
Britania ka raportuar pothuajse 10,000 vdekje nga koronavirus deri më tani, numri i pestë më i lartë në botë.
“Ndërsa mjekët dhe infermierët tanë të shkëlqyer luftojnë koronavirusin, ne po ofrojmë ekspertizë dhe fonde britanike në të gjithë botën për të parandaluar një valë të dytë vdekjeprurëse që të arrijë në Mbretërinë e Bashkuar,” tha Trevelyan në një deklaratë.
“Koronavirui nuk pyet për kufijtë, kështu që mundësia jonë për të mbrojtur popullin britanik do të jetë efektive vetëm nëse forcojmë sistemin e kujdesit shëndetësor edhe të vendeve në zhvillim që janë shumë të rrezikuara.”, shtoi ajo. /Oponion.al
