Britania e Madhe ka hapur dyert për shtetasit e huaj, por cilido që do të udhëtojë drejt këtij vendi nga 8 qershori, do të duhet të izolohet për 14 ditë.
Ata që mbërrijnë në vend, me avionë, trena e traget, përfshirë shtetas britanikë, do të duhet të japin adresën ku do të vetëkarantinohen, e në rast të shkeljes se rregullave do të gjobiten me 1 000 paund.
Industria e Aviacionit Civil dhe disa deputetë konservatorë e kanë kundërshtuar masën, por sekretarja për Punët e Brendshme, Priti Patel, tha se ligji i ri synonte parandalimin e një vale të dytë të koronavirusit:
“Shkenca ka folur qartë. Nëse kufizojmë rrezikun e importimit të rasteve të reja nga jashtë, mund të ndihmojmë në parandalimin e një vale të dytë shkatërruese nga Covid-19”, u shpreh ajo.
Shumë industri paralajmërojnë se do të preken rëndë nga rregullat e reja, dhe British Airways, EasyJet dhe Ryanair janë ankuar ndaj masës te prokurori i përgjithshëm, Sir Jonathan Jones, hapi i parë i aksionit ligjor kundër qeverisë.
Nga rregullat do të përjashtohen shtetasit e Republikës së Irlandës dhe punonjësit e disa industrive që ofrojnë shërbime thelbësore./Opinion.al
