Mbretëria e Bashkuar po shqyrton mundësinë për të marrë pjesë në projektin “klubi i kombeve” të Bashkimit Evropian.
Takimi i parë i “Komunitetit Politik Evropian” do të mbahet në Pragë në fillim të tetorit.
Downing Street dëshiron të njihet me më shumë detaje mbi samitin përpara se kryeministrja Liz Truss të angazhohet për të marrë pjesë në të. Deri më tani ende nuk është marrë asnjë vendim përfundimtar.
Komuniteti Politik Evropian është një ide e përkrahur nga presidenti francez Emmanuel Macron.
Ai e propozoi atë, në maj, si një “hapësirë të re” për bashkëpunim. Macron sugjeroi se ky grupim mund të diskutojë për çështjet e sigurisë, energjisë, transportit, si dhe lëvizjen e lirë të njerëzve, veçanërisht të rinjve. Synimi i gjerë i kësaj nisme është krijimi i një forumi që shkon përtej 27 vendeve anëtare të BE-së.
Ide të ngjashme janë përhapur për dekada, por kjo është shtytja e parë e madhe për një forum të tillë që nga Brexit. Zyrtarët e Mbretërisë së Bashkuar thuhet se po kërkojnë garanci se takimi nuk do të dominohet nga vendet apo institucionet e BE-së.
Mësohet se pjesë e kësaj nisme do të jenë Ukraina, Norvegjia, Zvicra dhe Turqia si dhe nga vendet e Ballkanit Perëndimor.
BBC shkruan se ka të dhëna se Britania dëshiron të konsultohet me qeverinë e Ukrainës, si dhe me aleancën ushtarake mbrojtëse, NATO-n përpara se të japë një përgjigje.
Takimi inaugurues i “Komunitetit Politik Evropian” do të zhvillohet më 6 tetor në kryeqytetin çek, Pragë. Republika Çeke aktualisht mban presidencën e rradhës të Këshillit Evropian.
Një axhendë e përkohshme sugjeron se diskutimet do të përqendrohen në pushtimin e Ukrainës nga Rusia, ekonominë dhe krizën energjetike të Evropës.
Megjithatë, ka pak detaje se si do të dukej një “komunitet politik” i tillë në planin afatgjatë.
Për kritikët, brenda BE-së, ekziston dyshimi se Franca, një skeptike e njohur e zgjerimit të BE-së, dëshiron të krijojë një “zonë pritjeje” për vendet që aspirojnë të anëtarësohen në Bashkimin Evropian. Ndërkohë, udhëheqësit e BE-së kanë insistuar se komuniteti nuk do të zëvendësojë politikën e tij të zgjerimit./Opinion.al
