Pasaportat e reja në Britani po lëshohen pa mbishkrimin “Bashkimi Europian” në kopertinë, megjithëse Brexit nuk ka ndodhur ende.
Pasaportat e reja u shfaqën nga 30 marsi, një ditë pasi Britania planifikohej të largohej nga blloku, shkruan “Radio Evropa e Lirë”. Susan Hindle Barone, që ka pranuar pasaportën e saj të re të premten, tha për agjencinë e lajmeve AP se dizajni i pasaportës sipas saj nuk duhet të ndryshojë derisa Britania është ende pjesë e BE-së.
Një zyrtare e Ministrisë së Brendshme, deklaroi se pasaportat me mbishkrimin “Bashkimi Europian” do të vazhdojnë të lëshohen edhe për një periudhe të shkurtër.
Kryeministrja britanike, Theresa May i ka kërkuar Bashkimit Evropian shtyrje të datës për Brexit deri më 30 qershor. Aktualisht Britania pritet të largohet nga BE-ja më 12 prill, ndonëse ende nuk është arritur ndonjë marrëveshje në Britani për këtë çështje./Opinion.al
