Një deputete britanike ka ndërruar jetë, pasi u qëllua me armë dhe me thikë gjatë një sulmi të ndodhur në zonën e saj elektorale. Dëshmitarë të ngjarjes thanë se Jo Cox, 41 vjeç dhe që përfaqëson laburistët në Parlamentin britanik nga zona e “Batley and Spen”, mbeti e shtrirë përtokë dhe e gjakur nga agresori i saj. Një tjetër person mbeti i plagosur lehtë.
Megjithatë, një 52-vjeçar është arrestuar pranë “Market Street” të Birstall, sipas asaj që bën të ditur policia e “West Yorkshire”. Deputetja ishte duke zhvilluar një mbledhje këshilluese të përjavshme. Edhe ndihmësi i Cox-it konfirmoi sulmin ndaj saj.
Deputetja laburiste, e cila bën fushatë kundër daljes së Britanisë nga BE-ja, u dërgua me ambulancë drejt Infermierisë së Përgjithshme të Leedsit, ku gjendeshin edhe forca të armatosura policore jashtë ambienteve, por nuk u ka mbijetuar plagëve të marra.
Dëshmitari Hithem Ben Abdallah tha se 41-vjeçarja, nënë e dy fëmijëve, mbeti e shtrirë dhe e gjakosur në rrugë, pas incidentit. Pas një grindjeje të shkurtër me dikë tjetër, sipas dëshmitarit, agresori bëri një hap prapa dhe më pas në këtë përplasje u përfshi edhe deputetja. Abdallah thotë se arma ishte “e punuar me dorë”, ndërsa personi tjetër që po grindej me agresorin vijoi përleshjen edhe pasi pa armën.
“Agresori bëri një hap prapa dhe nxorri armën. Qëlloi dy herë dhe më pas vijonte të shihte nga toka. E goditi deputeten teksa mbeti e shtrirë”, tha ai. Bashkëshorti i saj, Brendan, thjesht sa publikoi foton e saj në rrjetet sociale.
Jeremy Corbyn, kreu i laburistëve shkroi “online” se “kishte mbetur tërësisht i shokuar nga lajmi i sulmit” dhe se “mendimet e të gjithë Partisë Laburiste” ishin në këtë moment me zonjën Cox. Edhe kryeministri David Cameron shkroi në “Twitter” duke shprehur shqetësimin e tij. “Mendimet dhe lutjet tona janë me Jo dhe me familjen e saj”.
Zonja Cox, e cila është lindur në Batley, u zgjodh deputete në vitin 2015. Ajo është arsimuar në “Heckmondwike Grammar School” dhe diplomuar nga “Cambridge University” në vitin 1995./T.CH
