Kryeministri britanik, Boris Johnson dhe kancelarja gjermane, Angela Merkel, ranë dakord se duhet të punojnë me partnerët ndërkombëtarë, për të ndërmarë një përgjigje të përbashkët ndaj sulmeve në objektet e naftës në Arabinë Saudite.
Të dy liderët gjithashtu ranë dakord se ekziston nevoja për ç’tensionimin e situatës në rajon, si dhe u angazhuan për një qasje të përbashkët ndaj Iranit, vend ky i cili u akuzua nga presidenti i SHBA-së, Donald Trump, për sulmin ndaj objekteve saudite të naftës.
Irani ka mohuar përfshirjen në sulmet ajrore që kanë ndodhur të shtunën, për të cilat përgjegjësinë e morën rebelët huthi në Jemen, që janë të lidhur me Iranin.
Disa zyrtarë amerikanë kanë thënë për mediat ndërkombëtare se drejtimi dhe madhësia e sulmit ngre dyshime për përfshirjen e rebelëve huthi.
Ky incident ka zvogëluar furnizimet me naftë për 5 për qind, gjë që ka ndikuar në rritjen e çmimit të karburantit./Opinion.al
