Ish-kampioni në peshëngritje Briken Çalja i është përgjigjur deklaratave të kryeministrit Edi Rama në emisionin Opinion duke i thënë se atë e kanë keqinformuar zyrtarët e Ministrisë.
Kryeministri Rama tha mbrëmjen e së enjtes në emisionin Opinion se në bazë të kuadrit ligjor, Brikeni i ka marrë shpërblimet dhe shtoi se ai bashkë me atletin Izmir Smajlaj do të fillojnë punë në Ministrinë e Mbrojtjes.
Në përgjigjen e tij Briken Çalja ka publikuar një letër që Federata Botërore i ka dërguar Ministrisë së Arsimit dhe sporteve ku saktëson se në Kampionate Evropiane dhe Botërore sportisti mund të fitojë deri në tri medalje për të cilat ai edhe duhet të marrë shpërblim sipas ligjit.
Ai shkruan gjithashtu se në lidhje me këtë rast kryeministri është keqinformuar nga zyrtarët e ministrisë të cilët sipas tij e kanë “lexuar mbrapsht” kuadrin ligjor.
Letra e Briken Çaljas
PËRGJIGJE DHE SHPJEGIM NDAJ FJALËS SË KRYEMINISTRIT Z.RAMA DJE NË EMISIONIN OPINION
Z.Kryeministër, së pari ju falenderoj për përgjigjen ndaj problemit që unë po has në lidhje me shpërblimin e medaljeve si shkak i meseleve të një keqinterpretimi me ose pa dashje.
Së dyti, e ndoqa me vëmendje fjalën tuaj mbrëmë dhe po ju them që më është shtuar besimi që ju do i jepni një zgjidhje situatës.
Por nga ana tjetër, doja t’ju shprehja drejtpërdrejt faktin që zyrtarët e Ministrisë ju kanë keqinformuar dhe kanë përcjell tek ju një informacion që nuk ka asnjë bazë dokumentare.
Ekziston një dispozitë e qartë ligjore, jam shumë darkord me ju, dhe kjo dispozitë ligjore mbështetet në rregullat ndërkombëtare të Federatës Botërore, por doja t’ju vija në dijeni që rregullat ndërkombëtare nuk lexohen mbrapsht ashtu si i lexojnë qoftë nga paaftësia, qoftë nga padija specialistët e Ministrisë të cilët kanë bërë gjithë këtë mesele keqinformimi, duke ngritur një situatë aspak normale e të favorshme që unë të garoj e të jap më të mirën për ekipin kombëtar.
Po ju vë në dispozicion letrën që Federata Botërore i ka dërguar Ministrisë së Arsimit dhe sporteve si kthim përgjigje me kërkesë të kësaj të fundit lidhur me informimin mbi numrin e medaljeve dhe përcaktimin e shpërblimeve.
Siç shikohet qartë nga kthim-përgjigjja, rregullat ndërkombëtare që ju përmendni thonë qartë që në Kampionate Evropiane dhe Botërore sportisti mund të fitojë deri në tri medalje (shtytje, shkëputje, dygarësh) dhe shpërblimi bëhet në bazë të këtyre mendaljeve siç edhe ju e thatë. Vetëm në rastin e lojrave Olimpike sportisti mund të fitoj vetëm një medalje (dygarësh). Për shpjegim dhe saktësim doja t’ju thoja që nuk po diskutojmë mbi VKM-në përkatëse por thjesht zbatimin e saj.
Ligji i sportit është më i miri i viteve të fundit por zbatimi i tij mbetet sfidë e madhe.
Dua t’ju marr disa minuta nga koha juaj e t’ju ftoj që ti hidhni një sy VKM-së, letrës kthim-përgjigjeje dhe rregullave ndërkombëtare për shpërblimet. Jam i gatshëm të bashkëpunoj në çfarëdo forme që ti japim drejtimin e duhur kësaj rrëmuje artificiale të ngritur pa shkak. Jam i gatshëm dhe sfidoj këdo që lexon mbrapsht një fjali të shkruar drejt dhe shqip.
Në pritje të zgjidhjes, Brikeni /Opinion.al
