Theresa May po bëhet gati për të nisur një tjetër javë në ferrin që quhet Brexit. Anëtarët e parlamentit janë bërë së bashku për ta shtyrë daljen e Britanisë së Madhe nga Bashkimi Europian. E ardhmja e vendit do të vendoset në një tjetër mbledhje të House of Commons. Parlamenti pritet të votojë për mënyrat e daljes nga qorrsokaku ndërsa kanë mbetur vetëm 59 ditë nga Brexit.
Parlamentarët hodhën poshtë marrëveshjen 585 faqëshe të Brexit që propozoi May vetëm dy javë më parë. Tani ata janë gati për ta mundur Kryeministren sërish në këtë betejë. Të martën në mbrëmje pritet të votohet “Plani B” që detyron Theresa May-n të shtyjë Brexit-in. Parlamentarët kërkojnë gjithashtu që May të heqë dorë nga kërcënimi “pa marrëveshje”.
Kanë kaluar 947 ditë qëkur Mbretëria e Bashkuar votoi të dilte nga Bashkimi Europian, dhe duket se bisedimet kanë ngecur. Me kohën që ecën dhe qindra ligje që duhen kaluar përpara datës 29 mars (kur pritet që MB të dalë nga BE), qeveria po konsideron anullimin e pushimeve të shkurtit dhe t’i detyrojë parlamentarët të punojnë 12 orë në ditë. Deputetët e parlamentit deri tani kanë hedhur poshtë 15 amendamente “Plani B” të marrëveshjes së kryeministres. Një pjesë e tyre pritet të përzgjidhen për t’u votuar të martën./E.L
