Kryeministrja britanike, Theresa May i ka nisur një letër shefit të Këshillit Europian, Donald Tusk, duke kërkuar në mënyrë formale shtyrjen e “nenit 50”, që do të vonojë shkëputjen e Britanisë së Madhe përtej 12 prillit, deri më 30 qershor.
May ka thënë se do të përpiqet të sigurojë një marrëveshje për shkëputjen deri më 22 maj, dita e fundit përpara zgjedhjeve europiane, por pranon se Britania e Madhe do të futet në zgjedhje dhe do të zgjedhë anëtarët e saj në Parlamentin Europian, nëse ajo dështon në përpjekjen e saj të disatë.
Por, burime nga Bashkimi Europian thonë se krerët e shteteve anëtare do të refuzojnë datën e re të 30 qershorit të kërkuar nga May, e madje pritet t’i thonë asaj se vetëm një marrëveshje njëvjeçare do të shtrohet si opsion i vetëm.
Kujtojmë se Presidenti i Këshillit Europian, Donald Tusk është shprehur se një ofertë “elastike” 12-mujore do të ishte “e vetmja rrugëzgjidhje e arsyeshme” për krizën e “Brexit”-it, duke kërkuar madje nga udhëheqësit e 27 vendeve të tjera të Bashkimit Europian që ta mbështesnin në idenë e tij gjatë ditës së sotme./Opinion.al
